Poraz od Hrvatske nije poremetio atmosfera unutar vaterpolista Crne Gore, svjesni su da još ima da se igra i da imaju šanse da se nađu u četvrtfinalu.

Jučerašnji dan proveo se u analiziranju meča sa "barakudama" i pripremi onoga što slijedi večeras, duel sa Grčkom, koja je na premijeru dobila Rumuniju (14:7).

"Ajkule" žele trijumf, ali zadatak neće biti lak.Protiv sebe će imati vrhunsku ekipu u kojoj su Konstantinos Kakaris, Angelos Vlahopulos, Dimitris Skumpakis...

– Da se vratim na Hrvatsku, mislim da je bila egal utakmica do sredine treće četvrtine i da smo im pružili dobar otpor. Došli smo kao neko ko stvarno nije favorit za medalju, iako ja to ne vidim tako. Žao mi je što na kraju meča nismo bolje odigrali, bilo je par sitnica gdje smo mogli bolje. Falilo je i malo sreće da tu utakmicu uvedemo u egal završnicu i da na kraju dođemo do peteraca ili pobjede. Mislim da smo pokazali zašto smo došli ovdje - istakao je centar Miroslav Perković.

Slijedi duel sa još jednom vrhunskom ekipom protiv koje Crna Gora ima pozitivan skor.

Biće ovo 39. međusobni meč, a "ajkule" imaju 25 pobjeda uz 11 poraza u dva neriješena.

– Mislim da Grci nisu nimalo lakši rival od Hrvata. Imaju svoje kvalitete za razliku od Hrvatske koja je dominantna svojom snagom i fizikom, Grci imaju takve igrače koji jako dobro plivaju, par igrača koji su virtuozi, koji sve vide i sve mogu. Jako su dobar protivnik, ali ćemo se dobro pripremiti, koncentrisaćemo se da što više umanjimo njihove kvalitete i mislim da možemo da tražimo svoju šansu dobrom igrom i da na kraju dođemo do pobjede.

Protiv Hrvatske se Crna Gora mučila sa igračem više.

– Vaterpolo se posljednjih godina svodi najviše na tog igrača više-manje. Mislim da smo igrača manje, s obzirom da su imali 17-18 igrača više, odigrali korektno i jako dobro. Sa druge strane, naš igrač više nije bio zadovoljavajući i sigurno da moramo da realizujemo mnogo više tih šansi - jasan je Perković

Dušan Matković ulogu favorita je prepustio rivalu, ali vjeruje u trijumf svog tima.

– Svaka ekipa je posebna na svoj način, ima svoje prednosti i mane. Treba da analiziramo Grčku, pa ćemo da vidimo šta ćemo da spremimo. Dosta smo mečeva odigrali sa Grčkom u ovom olimpijskom ciklusu. Mislim da će presuditi smirenost i želja za pobjedom. Mislim da mi nismo ekipa koja može da prijeti. Ali, možemo da pomrsimo račune svakoj ekipi, protiv koje igramo. Mi smo Hrvatsku u posljednjih nekoliko mečeva uspjeli da pobijedimo i to nam govori da imamo kvalitet da se nosimo sa najjačim svjetskim ekipama - zaključio je Matković.

Raspored

Grupa A: Hrvatska - Italija (12.05), SAD - Rumunija (16.35), Crna Gora - Grčka (19.30).

Grupa B: Australija - Srbija (10.30), Japan - Francuska (15), Španija - Mađarska (21.05).