Liverpul je malo opuštenije ušao u meč protiv "fenjeraša" Sautemptona koji je golom Vilijama Smolbona poveo u prvom minutu nadoknade prvog poluvremena, ali je u nastavku lider stvari postavio na svoje mjesto, režirao preokret i vezao treću uzastopnu pobjedu, ukupno 21. u Premijer ligi i umakao Arsenalu čak 16 bodova uz dva meča više.

"Redsi" su uz nova dva gola Mohameda Salaha (ukupno 27) koji je bio siguran sa bijele tačke u 53. i 88., te Darvina Nunjesa koji je bio strijelac u 52. minutu napravili dobru uvertiru i za revanš osmine finala Lige šampiona protiv Pari Sen Žermena.

I u preostala dva duela popodnevnog programa 28. kola slavili su domaćini. Žoao Pedro je u osmom minutu nadoknade iz penala donio četvrti vezani trijumf Brajtonu nad Fulamom za skok "galebova" na šesto mjesto i u zonu Lige Evrope, dok je Kristal Palas opravdao ulogu favorita protiv Ipsviča i pogotkom Sara u 82. minutu vezao treću pobjedu kojom je potvrdio dobru formu.

Čast gostiju u prvom od dva meča večerašnjeg programa spasila je Aston Vila, koja je golom Olija Votkinsa slavila protiv Brentforda (1:0). 

Rezultati 28. kola: Notingem Forest - Mančester siti 1:0 (0:0) (Hadson-Odoj 83), Brajton - Fulam 2:1 (1:1) (Van Heke 41, Žoao Pedro 90+8p - Himenez 35), Kristal Palas - Ipsvič 1:0 (0:0) (Sar 82), Liverpul - Sautempton 3:1 (0:1) (Nunjez 52, Salah 53p, 88p - Smolbon 45+1). Brentford - Aston Vila 0:1 (0:0) (Votkins 49), Vulverhempton - Everton (21.00).