Izabranici Gorana Perišića trenutno se nalazi se na trećem mjestu svoje grupe sa devet bodova, pa bi eventualni trijumf nad jednim od favorita „sokoliće" vratio u borbu za drugo mjesto.
Napadač naše reprezentacije Vladimir Perišić je apostrofirao atmosferu u ekipi i rekao da je ona jedan od ključnih faktora.
-Atmosfera u ekipi je fenomenalna poslije pobjede nad Jermenijom, iako nismo igrali baš onako kako smo očekivali. Pobjeda je najvažnija, tri boda su tu, okrenuli smo se Italiji. Analizirali smo ih i očekuje nas teška utakmica, ali ćemo dati svoj maksimum i pokušaćemo da ispravimo greške iz prethodne. Kao i uvijek, idemo na pobjedu i tri boda – poručio je centarfor slovačkih Košica.
Jedan od najmlađih u našim redovima, golman Balša Radanović, vjeruje u dobru igru svoje ekipe.
-Sigurno da protiv Italije ulazimo sa velikim samopouzdanjem, jer smo u protekle dvije utakmice uzeli maksimalan broj bodova. Italija važi za favorita u našoj grupi, a to je motiv više za nas da izađemo u punoj snazi i pokažemo da nismo za podcjenjivanje. Pozvao bih navijače da dođu i podrže nas u što većem broju. Siguran sam da ćemo im vratiti dobrim rezultatom – istakao je golman Rudara.
Utakmica na stadionu kraj Bistrice počinje u 18:15 sati.
