Baranin Dino Beharović napravio je pravi bum na crnogorskoj muzičkoj sceni novom pjesmom "Da ne čuje zlo". Za jako kratko vrijeme jedna je od najtraženijih na radio stanicama u Crnoj Gori, a skoro da nema muzičara koji je ne izvodi na svojim nastupima. Pjesma je balada, a za nju je muziku i tekst radio Bane Opačić, a aranžman Marijo Pajić.
– Pjesma je u nekom stilu koji inače privatno volim. Ekranizovao sam pjesmu. Spot je radio Dejan Senić i Bubulj produkcija. Pjesmu nijesam nikome posvetio. Nekako mi se na prvu svidjela i melodija i tekst, ali i tema. Tako je i stilski da kažem moja "šoljica čaja". Sve se desilo nekako kako ja volim. Ljudi koji su čuli pjesmu još od kavera koji sam izbacio prije nego je aranžman urađen su baš oduševljeni i imam sve pohvale i na stil pjesme i na tekst i muziku – ističe Dino.
Dino navodi da mu je najveći uspjeh to što publika zna pjesmu i što je na nastupima traže i pjevaju sa njim.
– To mi je nekako i potvrda da sam odradio dobru stvar. Osim ove imam još dvije snimljene pjesme. Za "Volim te bolesno" tekst i muziku radio je Steva Simeunović, a aranžman Saško Nikolić, dok su "Priviđač" radili Dražen Damjanović i Senad Drešević. U pitanju su malo brže pjesme koje baš i nisu nešto medijski ispraćene, ali su podjednako dobre kao i ova – kaže Beharović.
On smatra da je crnogorska muzička scena odlična i da ima dosta talentovanih vokala i odličnih pjevača.
– Sa većinom sam privatno dobar i drago mi je što su se da kažem malo "probudili" što se tiče i snimanja pjesama i ulaganja u rad i karijere. Što se tiče takmičenja nisam razmišljao u tom pravcu. Završio sam Muzičku akademiju instrumentali smjer - harmonika. Bio sam prvak na mnogobrojnim i državnim i međunarodnim takmičenjima. Što se pjevanja tiče dosta radim na sebi pošto sam i klavijaturista i pjevač. Tu je sa mnom i otac koji svira gitaru. Nekako smo napravili da kažem "brend" otac i sin koji za sada baš dobro rade posao i sve ide uzlaznom putanjom.Tako da ne bih ja tu ništa mijenjao – kazao je Beharović.
Dino kaže da će novu pjesmu promovisati 12. februara u Sutomoru.
– Nadam se da ću stići pred ljeto da izbacim nešto malo brže. U planu je duet koji ne bih da otkrivam, dok se ne realizuje. Ana Bekuta, Aleksandra Prijović, Slađa Alegro su tri najbolja vokala. Volio bih da sa njima snimim duet. Kada govorimo o snimanju nekako sam više da izbacujem pjesmu po pjesmu, pa tako stignem do albuma. U ovom trenutku se više isplati izbacivati pjesmu po pjesmu. Naravno postoje pjevači poput onih koje sam pomenuo koji su napravili karijeru i u mogućnsoti su da snime album. Od njih se to očekuje, dok nove generacije većinom izbacuju singlove, jer na taj način traže svoj stil i pravac kojeg bi se držali, što je realno i najteže za pjevača. Smatram da sam svoj stil pronašao i ići ću naravno u tom pravcu i nastiviti da radim na sebi kao i do sada – rekao je Dino.
Коментари (0)
Оставите свој коментар