Italijanska vlada danas je objavila da vrijednost dosad zamrznute imovine ruskih oligarha u Italiji iznosi oko 140 miliona eura, uključujući i jahte koje su zaplijenjene. Najznačajnija je zapljena jahte Lady M, vrijedne 65 miliona eura u vlasništvu Alekseja Mordašova, ruskog oligarha bliskog Vladimiru Putinu koji je na meti sankcija Evropske unije nakon što je Moskva napala Ukrajinu, prensoi Indeks HR.

Druga jahta imena Lena vrijedna oko 50 miliona eura. U vlasništvu je Genadija Timšenka, milijardera i suosnivača Gunvora, kompanije za trgovinu, koja je juče takođe zaplijenjena. Zaplijenjena je i imovina u vrijednosti od oko 17 miliona eura ruskog milijardera Ališera Usmanova.

U saopštenju italijanske vlade stoji da su zaplijenjene i nekretnine u vlasništvu dviju osoba bliskih ruskim vlastima, čija ukupna vrijednost iznosi oko 11 miliona eura. Evropske sankcije ciljaju na više od 500 ruskih osoba ili pravnih subjekata, čija se imovina i resursi moraju postupno zamrzavati sve dok ih evropske države ne uspiju locirati i povezati s njihovim vlasnicima.