Hrvatska teniserka Dona Vekić plasirala se u polufinale Olimpijskih igara u Parizu, pošto je u fantastična tri seta bila bolja od Ukrajinke Marte Kostjuk 2:1(6:4. 2:6, 7:6(10:8).

U prvom setu Hrvatica je glatko stigla do 5:1, ali nije uspjela da bez neizvjesnosti povede 1:0. Vratila se 19. igračica VTA rang liste na 5:4, ali više od toga nije mogla, te je na semaforu pisalo 6:4 za Vekić. Da duel bude odlučen u trećem setu pobrinula se uzdanica Ukrajine, prepustivši rivalki samo dva gema u drugom dijelu igre. 

Vrhunac drame dobili smo u odlučujućem setu. Propustila je Vekić dvije meč lopte u 10. i 12. gemu, te je pobjednicu odlučivao taj-brejk. Obilovao je 13. gem oscilacijama rezultata. Od naizgled nedostižnih 5:2 za Kostjuk, do meč lopte za nju na 6:5. Zatim, dvije nove propuštene šanse za Vekić i onda tek peta meč lopta iskorištena za konačnih (10:8). 

 Posle maratonskog četvrtfinala, koje je potrajalo tri sata, Vekić će u borbi za finale ukrstiti rekete sa Slovakinjom Anom Karolinom Šmjedlovom, dok drugi polufinalni par čine Poljakinja Iga Švjontek i Kineskinja Ćinven Dženg.