Iz Udruženja za razvoj Pipera navode da je polaganje vijenaca zakazano za 8:30 sati. Očekuju prisustvo više zvaničnih delegacija.

– Na ovaj dan, prije 84 godine, na ovom mjestu, u srcu Pipera – devet hrabrih ljudi okupljenih pod

okriljem crnogorskog Pokrajinskog komiteta Komunističke partije Jugoslavije – donijelo je odluku da podignu ustanak i time započnu vojni otpor okupatoru i njegovim slugama. Taj veličanstveni crnogorski otpor je vremenom prerastao u jedan od najsnažnijih elemenata onog zajedničkog jugoslovenskog otpora, a naši partizani su svoj slavni ratni put, započet ovdje u Piperima – nastavili diljem velike Jugoslavije. Time su dali pečat velikoj pobjedi jugoslovenskih naroda u najvećem svjetskom ratu, u kojem je pobijeđeno najveće zlo modernog čovječanstva - navode iz Udruženja za razvoj Pipera.

Kako kažu, svake godine, proslavljajući ovaj datum, prisjećaju se devet hrabrih ljudi, od kojih su njih trojica Piperi.

– Sjećamo se njih kao i svih onih hrabrih ljudi koji su u tom ustanku i kasnijoj borbi učestvovali, i ideje kojoj su svi oni služili - ideje koja je okupljala naše pretke i koja će okupljati naše potomke – navode iz Udruženja za razvoj Pipera.

Odluku o podizanju ustanka donijeli su Milovan Đilas, Božo Ljumović, Blažo Jovanović, Savo Brković, Radoje Dakić, Budo Tomović, Krsto Popivoda, Periša Vujošević i Vido Uskoković. Njihova imena nalaze se na spomeniku u Ravnom Lazu.

N.S.