Koncertom poznatog hrvatskog muzičara Gorana Karana na Cetinju je sinoć obilježen Dan nezavisnosti.

Karan je za brojnu publiku na Dvorskom trgu izveo svoje najveće hitove poput "Vagabundo", "Lolita", “Ostani“, “Lipa si lipa“ i mnoge druge.

 - Večeras je Dan nezavisnosti Crne Gore i velika mi je čast i zadovoljstvo što sam došao iz Splita pjevati ovdje. Daćemo sve od sebe da koncert bude na razini čojstva i junaštva, bar muzičkoga. Svi su obučeni u zastave, majice, nose kape, i sva su obilježja tu. Mi ćemo samo malo pogurati atmosferu, naromantizovati je. Iako je nacionalni praznik, nacija se održava ljubavnim odnosima, to je jasno, kako bi inače došlo do stanovništva. Onda, mi za godinu dođemo, dobijemo rodne listove i onda znamo je li bio bio dobar koncert - našalio se Karan, prenosi Radio Crne Gore.

On je dodao i da nastupaju treći put na Cetinju.

- Danas, ako bude lijepo vrijeme, malo ćemo do Lovćena. Bio sam nekoliko puta, al svaki put neko novo iskustvo. Tako da baš bi bilo dobro - naglasio je Karan.

Organizatori koncerta su Prijestonice Cetinje i Turistička organizacija grada.