Kako prenose italijanski mediji, vjeruje se da je četvrto dijete pobjeglo sa majkom u oblast San Paolo, nedaleko od naselja Gratosoljo, gdje se i desila nesreća. Vjeruje se da je samo pitanje vremena kada će ih policija pronaći. 

Inače, sudija za maloljetnike izdao je još 16. avgusta, zabranu putovanja za troje od četvoro djece, jer su i neka od ovo troje pokušala da pobjegnu, ali su pronađeni na naplatnoj rampi.

Podsjetimo, do nesreće je došlo u milanskom naselju Gratosoljo kada je Sesilija De Astis (71) krenula prema autobuskoj stanici. Na nju je naletjelo vozilo za čijim volanom je bio 13-godišnjak. S njim u vozilu bilo je još troje maloljetnika dobi 11 i 12 godina, dva dječaka i djevojčica. Vozilo je bilo ukradeno od francuskih turista.

Lokalna policija ih je pronašla u roku od 36 sati prateći neobičan trag: majice sa likovima Pokemona koje su nosila trojica dječaka.

Inače, istragom je utvrđeno da su djeca provalila u automobil francuskih turista veče prije nesreće. Uzeli su im kofere i sve elektronske uređaje, a među stvarima su pronašli i rezervni ključ. To ih je navelo da se narednog dana vrate do automobila i odvezu ga. Tada je i došlo do nesreće.

Naime, maloljetnici su pušteni i predati majkama jer nemaju 14 godina i ne mogu krivično odgovarati.